O ancián de 96 anos morto nun incendio en Viana queimouse mentres intentaba extinguilo
O home provocouno accidentalmente ao plantar lume a uns restrollos
Centos de persoas encheron onte o pequeno cemiterio da parroquia de Quintela de Umoso, no municipio ourensán de Viana do Bolo, para despedir a Severino Basalo Cid . O home, de 96 anos, pereceu o mércores queimado polas chamas dun incendio forestal provocado accidentalmente por el mesmo. Os feitos ocorreron á primeira hora da tarde. A pesar da súa idade, o home era moi activo e, tras comer co seu fillo Manuel Basalo e a súa irmá Asunción na casa familiar, decidiu subir ata un souto próximo da súa propiedade. Unha vez alí dedicouse a queimar restrollos, actividade que mantiña nos meses de alto risco de incendios e para a que nunca pedía autorización. «Eu xa lle tiña dito ao seu fillo que algún día iamos ter un desgusto», explicaba onte Domingo Álvarez, un dos 18 veciños de Quintela de Umoso.
No lugar no que se produciu o incendio apréciase o lugar onde comezaron a arder os restrollos, moi próximo á maleza que rodea ao souto. Todo apunta a que saltou unha faísca e o lume se descontrolou nunha zona de monte baixo.
Os medios desprazados ata o lugar pola Consellería do Medio Rural -un axente forestal, catro brigadas, tres motobombas e un helicóptero- chegaron pronto e conseguiron controlar as chamas en pouco tempo. Finalmente, só se queimaron 0,01 hectáreas.
Unha vez extinguido o incendio, os veciños déronse conta de que Severino Basalo non estaba na casa nin en ningún outro punto do pobo, de modo que entre os veciños e a Garda Civil estableceuse un dispositivo de procura. Con todo, o home non estaba lonxe do lugar onde se declarou o incendio. Xusto no medio da zona queimada achouse o seu corpo case totalmente calcinado. Onte só quedaban no lugar un dos seus zapatos e a súa gorra. Tamén había alí un anciño co que se supón que o home intentou extinguir o lume. Todo apunta a que o fume lle fixo perder o coñecemento e caer ao chan, onde foi pasto das chamas. «Se coñece que co fume non tivo apaño para levantarse», lamentaba o seu fillo Manuel Basalo. As causas concretas da morte do seu pai nunca se coñecerán porque a xuíza desprazada ata o lugar descartou a autopsia debido á idade do falecido e á claridade das causas da súa morte.
