Avistadas de Cee a Valdoviño unhas sesenta aves petroleadas
Os expertos atribúeno a un sentinazo ou aos restos de combustible do «Kea»
Salvamento Marítimo peiteou onte co helicóptero Helimer 210 a zona na que se afundiu fai máis dunha semana o mercante Kea para controlar a evolución da mancha de combustible que liberou o barco. Nin rastro, informaron desde o órgano dependente do Ministerio de Fomento. Con todo durante a Semana Santa foron avistadas máis de medio centenar de aves petroleadas dende Cee, na Costa da Morte, ata Pantín, en Ferrolterra.
Un foro que os socios da Sociedade Galega de Ornitoloxía (SGO) teñen na Rede, denominado Galicia Aves, revela que dende o pasado día 1 -o naufraxio produciuse o 30 de marzo- diferentes especies de gaivotas -patiamarelas (Larus michahellis), sombrías (Larus fuscus), arxénteas (Larus argentatus) e delaware (Larus delawarensis)- deixáronse ver pola costa manchadas de hidrocarburos.
Juan Rodríguez Silvar, biólogo ferrolán e membro da SGO, cre que «quizá poda deberse aos restos de fuel do mercante afundido ou a algún sentinazo». O cántabro Jesús Menéndez, afeccionado á ornitoloxía, atopábase de vacacións na Costa da Morte, cando divisou sobre unhas oito aves manchadas de chapapote en cabo Vilán, Camariñas, cabo Touriñán e Muxía. «Algunhas estaban moi sucias», comenta este cántabro, que ao seu regreso a Castro Urdiales contemplou outros exemplares impregnados de chapapote. «Son animais moi viaxeiros», dí.
O ferrolán Antonio Gutiérrez, socio da SGO, acudiu á praia de Pantín, en Valdoviño, hai uns días e atopouse con bandadas de gaivotas sombrías duns 300 exemplares nas que «non menos de corenta estaban petroleadas en distinto grao». Dez delas, calcula, tiñan máis da metade do seu corpo impregnado de chapapote.
A lagoa da Frouxeira, en Valdoviño; Doniños e Esmelle, en Ferrol, e Lires, en Cee, son outros lugares da costa galega nos que se avistaron aves tintadas.
Rodríguez Silvar sinala que as gaivotas teñen máis posibilidades de sobrevivir tras entrar en contacto con hidrocarburos que outras especies. «Pasan máis tempo en terra, con todo outras aves tratan de limparse na auga, perden a permeabilidade das plumas, arrefríanse e acaban morrendo».
Hoxe Salvamento Marítimo ten previsto retomar o rastrexo, aínda que, sinalaron desde o órgano, a Axencia Europea de Seguridade Marítima, que analizou a mancha a través de imaxes de satélite, concluíu que non había afloramento de combustible.
{xtypo_feed}A Voz{/xtypo_feed}
