Chega a Galicia a chinche que arrasa os piñeiros de Estados Unidos

Leptoglossus occidentalis

Os expertos aínda non falan de praga, pero alertan sobre o desenvolvemento masivo dunha “ameaza en potencia”.

Leptoglossus occidentalis é o nome dunha pequena chinche (dun a dous centímetros) orixinaria da costa oeste de Estados Unidos. Aliméntase succionando a savia das acículas e as piñas verdes das coníferas, o que reduce a fertilidade destas árbores. En Norteamérica arrasa as plantacións de piñeiros e considérase unha praga forestal difícil de erradicar pola súa resistencia aos insecticidas. Ataca tamén ao ciprés e ao pistacho. É inofensiva para o ser humano, aínda que desprende o cheiro forte e desagradable das chinches.

Descrito por Heidemann en 1910, este hemíptero da familia das Coreidae deu o salto a Europa en cargamentos de madeira transportados en barco. Foi rexistrada por primeira vez en Italia en 1999. Múltiples introducións levárona a unha vintena de países, rexistrándose a súa presenza en España (Barcelona) no 2003. A esa cita seguiron as de Xaén (2008) Madrid, Murcia, Guipúzcoa e Zaragoza (2009), e Huesca (2010).

O pasado día 19, os galegos Javier Pérez Valcárcel e Fernando Prieto Piloña, do grupo Arquivos Entomolóxicos Galegos, localizaron un exemplar no domicilio do segundo, en Sanxenxo, e procederon á súa descrición na revista Arquivos Entomolóxicos co título Primeiros rexistros de “Leptoglossus occidentalis” para Galicia.

Tras esa primeira aparición puideron documentar máis. “Estes achados, afastados das áreas máis próximas de distribución ibérica coñecidas até a data, apoian a hipótese da expansión a partir de múltiples puntos de introdución con posteriores traslocacións”, precisa o traballo.

Segundo Fernando Prieto, “en Norteamérica é causante ás veces de episodios de alarma entre a poboación, cando estas chinches acoden en grandes cantidades ao interior de vivendas buscando lugares para invernar”, o que explica tamén a presenza na súa casa de Sanxenxo.

Un episodio similar produciuse o ano pasado en Zaragoza, coa invasión dun chalé “por centos e centos de insectos”, segundo recolleu o 12 de novembro de 2009 O Heraldo de Aragón.

“Esta chinche non ten depredadores específicos en Europa, e aínda que o impacto económico e ecolóxico da introdución descoñécese aínda, sí require seguimento o seu posible asentamento, expansión e eventual desenvolvemento masivo, porque comeza a haber indicios en determinadas zonas”, suxire Prieto. Unha idea que comparten responsables do departamento de Zooloxía e Antropoloxía Física da Facultade de Bioloxía da Universidade Complutense, que estudaron a chinche en Madrid coa seguinte conclusión: “Sería conveniente facer un seguimento polos danos que poida ocasionar ás masas forestais de piñeirais, así como tamén o impacto económico que pode ter en plantacións de pistacho”. Plantacións que tamén existen en Galicia, especialmente en Ourense, aínda que a principal preocupación na comunidade céntrase nos seus incontables piñeirais.

A Consellería de Medio Rural, consultada onte por La Voz de Galicia, asegura que non ten constancia de que exista esta praga en Galicia.

“Na comunidade hai outras 22 especies da familia Coreidae. A americana é a 23, e non sabemos aínda como vai afectar ás coníferas, dí Prieto, pero non hai dúbida de que é un insecto invasor e unha ameaza en potencia”.

Unha especie diferente da que colonizou os principais edificios de Nova Iorque.

A Leptoglossus occidentalis nada ten que ver coa chamada chinche de cama que está a ocasionar un problema sanitario de primeira orde en Nova Iorque. Desde o Empire State ao Lincoln Center, pasando polo hotel Waldorf Astoria, non hai edificio hexemónico que se librara da presenza deste insecto caseiro que logrou pór en pé de guerra ao alcalde Michael Bloomberg, decidido a combater a praga como sexa.

Se a das coníferas achada en Galicia é inofensiva para o home, a chinche de cama neoiorquina asesta molestos picotazos aos urbanitas de Manhattan cando están plácidamente durmidos. De aí o seu nome.

Sí se parecen os efectos económicos, moi importantes tanto no caso das plantacións de piñeiro como no da cidade de Nova Iorque, que acredita xa un descenso significativo do turismo, pois a praga afecta de cheo aos principais hoteis.

En Estados Unidos cifran nun 40% a diminución na viabilidade dos piñeiros pola acción da Leptoglossus occidentalis, e nun 80% a perda de piñóns. En Europa, segundo os expertos, podería producir cambios notables nos ecosistemas de coníferas.

 

{xtypo_feed}A Voz{/xtypo_feed}

Comparte isto!:

Este sitio web emprega cookies para que vostede teña a mellor experiencia de usuario. Si continúa navegando está dando o seu consentimento para a aceptación das mencionadas cookies e a aceptación da nosa política de cookies, pinche na ligazón para máis información.plugin cookies

ACEPTAR
Aviso de cookies