Detido un presunto incendiario en Mondariz

Detido un presunto incendiario en Mondariz polos axentes facultativos medioambientais do distrito XVII (Condado-Paradanta)

Dous axentes forestais do distrito forestal XVII colleron a un home “in fraganti” prendendo lume no monte da parroquia de Mouriscados do Concello de Mondariz.  
Medio Rural destaca a colaboración das Brigadas de Investigación Forestal coas forzas de seguridade, que permite pór a disposición xudicial aos delicuentes que provocan lumes forestais de forma intencionada.

Ponteareas, 17/03/2009 Dous axentes forestais do Distrito XVII (Condado-Paradanta) colleron in fraganti a un home de 67 anos de idade prendendo lume a monte privado da parroquia de Mouriscados do Concello de Mondariz.

Os axentes forestais actuantes, tras realizar as primeiras dilixencias, trasladaron ao presunto autor dun incendio forestal ás dependencias da Garda Civil de Ponteareas para a súa posta a disposición xudicial.

Grazas aos traballos de  extinción realizados polos medios do servizo de Prevención e Defensa Contra os Incendios Forestais, o lume só afectou a 0,25 has de superficie de varios propietarios particulares.

Dende a Consellaría do Medio Rural mantense o operativo de coordinación coas forzas de seguridade para continuar cos labores de vixilancia e control, co obxectivo de evitar novos incendios.