O GPS salva a vida a unha águia real do Xurés tiroteada en Salamanca
O emisor vía satélite que levaba encostado permitiu localizar malferida a «Eufemia», liberada na primavera
O localizador vía satélite que colocaran na primavera a unha águia real soltada no parque natural do Xurés, en Ourense, salvou a vida do ave, que puido ser localizada nunha dehesa de Salamanca, onde foi tiroteada. Eufemia, que así se chama a femia de águia real, permaneceu tres días seguidos no mesmo punto, o que fixo sospeitar aos técnicos de Grefa (Grupo de Rehabilitación da Fauna Autóctona e o seu Hábitat) que velan vía satélite pola súa supervivencia, dentro do plan de reintroducción que levan a cabo no Xurés, en colaboración coa Xunta de Galicia.«O animal atopábase en perfecto estado nun val moi rico en coello dentro do termo de Monterrubio de la Sierra, onde se lle observou xunto a Lobios, o macho liberado no 2007. Ao volver o pasado día 20 para comprobar o estado da parella, comprobamos que algo non ía ben, pois, segundo o noso receptor, estabamos moi preto e aínda non botara a voar. Estaba empolicada nun muro de mampostería, á beira da placa verde dun couto intensivo e desgraciadamente cunha á caída. Pegáronlle un tiro», sinala Ernesto Álvarez Xusto, presidente de Grefa.
Tras comezar os voos logo de 80 días no niño e mellorar as súas técnicas de caza para alimentarse por si mesma e independizarse, Eufemia non se afastou demasiado do parque do Xurés, onde era protexida e alimentada, pero a finais de outubro decidiu marcharse na que era a súa primeira aventura dispersiva. En dous días atravesou Portugal para entrar novamente en España á altura de Cidade Rodrigo. Percorreu uns 250 quilómetros ata que decidiu asentarse a uns 20 de Salamanca, nunha dehesa de vellas aciñeiras onde pastan vacas e porcos ibéricos, e cunha alta densidade de coellos para alimentarse. «Sorprende como puido localizar a tanta distancia e en tan pouco tempo unha zona como esta, onde conseguir alimento resulta sumamente doado», sinalaban os responsables do proxecto de reintroducción e que a seguían grazas aos dous transmisores vía satélite e terrestre que lle colocaron no Rodicio antes de liberala.
O veterinario que acompañaba aos buscadores da águia real, comprobou dúas fracturas de ósos, feridas e contusións diversas polos perdigóns, deshidratación severa, hipotermia e acusada perda de peso, tras varios días malferida. A ave foi intervida cirurxicamente e recupérase no hospital de Grefa en Madrid, no mesmo centro onde naceu en catividade.
En Ourense e os canóns do Sil, ao sur de Lugo, quedan outras seis parellas de águia real, especie en perigo de extinción.
