Dez días trala pista dun oso pardo ferido no Bierzo

 

O animal leva enganchado un lazo posto por furtivos e podería morrer estrangulado ou de inanición.
OsoÉ a batida máis longa que se recorda na comarca, pero non para cazar, senón todo o contrario. Tres equipos integrados por gardas, veterinarios e biólogos de Castela e León e Asturias levan desde a semana pasada buscando un oso pardo ferido por un lazo de aceiro, presumiblemente posto por furtivos. Un veciño de Páramo del Sil, no Alto Bierzo, avistou ao plantígrado o pasado 17 de agosto. De inmediato mobilizouse un operativo de urxencia para localizalo e curalo, algo que se prevé complicado pola previsible agresividade do animal.
O oso ten o lazo enganchado á altura da cintura. «Presenta un gran estrangulamento na zona e unha notable ferida descarnada. Ademais das evidentes molestias que debe producirlle, o seu estado pode carrexar outros efectos, como desnutrición como consecuencia dos problemas de mobilidade ou infeccións máis graves», explicaron desde a Consellería de Medio Ambiente de Asturias.
Fontes da Fundación Oso Pardo informaron de que se trata dun exemplar de cor escura, «posiblemente un macho adulto, pero non vello». O animal móvese indistintamente polos municipios de Páramo del Sil (León) e Degaña (Asturias), nunha franxa de entre 500 e 1.000 metros de ancho dacabalo das dúas provincias.

 

De momento conseguiuse fotografalo mediante unha cámara axustada a un telescopio, pero os intentos por capturalo – o último onte, cun dardo anestesiante- foron infrutuosos. Faltou puntería.

Comparte isto!:

Este sitio web emprega cookies para que vostede teña a mellor experiencia de usuario. Si continúa navegando está dando o seu consentimento para a aceptación das mencionadas cookies e a aceptación da nosa política de cookies, pinche na ligazón para máis información.plugin cookies

ACEPTAR
Aviso de cookies