Ourense encabeza a estatística española en número de incendios
A provincia suma en 9 días 45 de 85 intervencións de medios estatais
A provincia de Ourense é a máis citada nos informes diarios de “incidencias por incendios forestais” da Dirección Xeral de Protección Civil e Emerxencias do Ministerio do Interior dos últimos nove días de agosto. Tanto nos informes de situación, que este organismo emite cada día, como no detalle dos medios do Ministerio de Medio Ambiente para apoiar ás comunidades autónomas na extinción de incendios, Ourense é a provincia máis aludida. De 85 lumes con medios ministeriais, corresponderon a esta provincia 45, é dicir, máis da metade.
Do xoves 11, sobre un total de dezaseis lumes, catro foron de Ourense: Baños de Molgas, Cualedro, Xinzo e Riós. O venres 12, de nove lumes en total, cinco localizáronse en Carballeda de Valdeorras, Castrelo de Miño, Pereiro de Aguiar, Cea e o primeiro da capital, no que interviñeron avións procedentes de Asturias e Salamanca, á parte doutros medios con base en Galicia. Xa o sábado da pasada semana, día 13, foron 16 os sinistros de toda España que aparecen detallados e deles sete afectaron a Carballeda de Valdeorras, Castrelo de Miño, Ribadavia, Maceda e Oímbra, con dous en cada un dos últimos dous municipios.
O domingo día 14, entre os nove incendios figuran os de Carballeda de Valdeorras, Castrelo de Miño, Cortegada e Rubiá, mentres que o luns, día 15, Bande e Gomesende aparecen con outros sete, que son a suma de Andalucía, Castela e León, Extremadura e Baleares.
O día de máximo peso da provincia de Ourense foi o martes, día 16, con sete dos oito incendios do día, entre Baltar, Calvos de Randín, Xinzo, Maceda, A Merca, Ourense e Cea. O mércores día 17 son Paderne de Allariz e Rairiz de Veiga os concellos que comparten relación con outro de Navarra e dous de Burgos. Ourense e Sandiás son as únicas referencias do xoves, día 18, xunto con outros catro en diferentes comunidades. Antonte, venres, último día que se podía consultar onte, sobre catorce sinistros en total, a provincia de Ourense achega cinco: Baños de Molgas, Xinzo e Viana do Bolo, con dous nestes últimos concellos.
Onte, por outra banda, rexistráronse pola tarde incendios forestais en Ramirás, Taboadela e Pereiro de Aguiar.
{xtypo_feed}Orixinal{/xtypo_feed}
