Resumo 2ª xuntanza sobre o borrador da convocatoria para o pase ó Grupo C

Despois de ser tratado nas reunións do día 12 en Mesa Xeral e hoxe día 15 de novo na Subdirección Xeral de Provisión e Procesos Selectivos de Función Pública o borrador de convocatoria do segundo proceso de integración á escala de Axentes Facultativos Medioambientais (grupo C1, antes grupo C) dende a escala de Axentes Forestais (grupo C2, antes grupo D) quedou como segue:

 

BASES

• Non haberá descontos por respostas incorrectas igual que no anterior proceso de integración (Base II.1.1), nin nota de corte.
• Eliminación do proceso de concurso (Base II.2.), e, polo tanto, das Bases II.3. e III.16. por non existir un número determinado de prazas ofertadas.
• Eliminación do requisito de ter que presentar un certificado médico a aqueles que superen a oposición (Base IV.2.C).
• Substitución da redacción das Bases IV.4. e IV.5. recollendo o contido da anterior convocatoria e que se refire a que os que superen o proceso de integración “seguirán prestando servizos nos postos de traballo que estivesen ocupando con carácter definitivo”.

• Eliminación do tema 1, tema 2 (salvo “Competencias da Comunidade Autónoma en materia ambiental e de montes. A Consellería de Medio Rural: estrutura e organización.”), tema 3, a parte “As estacións forestais en Galicia” do tema 9, as partes “Granxas cinexéticas” e “Piscifactorías” do tema 17, tema 19, tema 20, e a parte “Fiscalidade dos montes veciñais e dos particulares” do tema 23.

Só quedou pendente do informe da Asesoría Xurídica da Xunta de Galicia a posibilidade de poder presentarse co título de Bacharelato, e que si é un informe positivo as organizacións CIG, UGT e CCOO aceptarían esta titulación para poder participar neste 2º proceso de integración. Pola súa banda a CSIF dixo que aínda sendo favorable o informe xurídico que impugnarían a convocatoria si se permite este aspecto.

Para CCOO a valoración é realmente positiva pois, por unha lado aceptaron a gran maioría de alegacións presentadas, e por outro parece factible que se comprometan a que haxa un proceso de integración a maiores para aqueles que agora non se poidan presentar. A nota negativa volveuna a dar a CSIF pois prefiren que se queden “tirados” 70 compañeiros en vez de 10 ou 15.

 

 

 

Santiago de Compostela, 15 de xuño de 2009

 

 

ACCIÓN SINDICAL
SECTOR ADMÓN. AUTONÓMICA de CCOO de Galicia