Resumo Mesa Xeral do 13 de marzo

O 13 de marzo tivo lugar a Mesa Xeral do NON. O goberno en funcións despídese paralizando a Función Pública, co apoio incuestionábel de CCOO e CSIF. Pasamos do extremo dos derradeiros días de Fraga, nos que se tomaron demasiadas decisións que comprometeron a acción do goberno entrante (sendo Alberte Núñez Feijoo o  Vicepresidente), a un goberno que non é quen de rematar asuntos aprobados cando non estaba en funcións.

 

A Mesa Xeral do día 13 foi mero trámite pois, fóra da modificación da RPT da consellaría de Pesca, estivo centrada na aprobación dunha morea de actas anteriores pendentes (xa era hora), e rogos e preguntas.

 

Chegados a este punto, a CIG fixo unha chea de rogos e preguntas, e as respostas resúmense en tres letras: NON.

 

• Vaise a publicar as oposicións de promoción interna que foron xa a Comisión de Persoal antes das eleccións? NON.
• Vaise negociar as oposicións de laborais da oferta do 2008? NON.
• Vaise negociar o concurso de traslados de funcionarios/as de corpos xerais? NON.
• Vaise negociar o concurso de traslados de persoal laboral? NON.
• Vaise publicar (ou re-negociar) o Fondo de Acción Social? NON.
• Vai seguir para adiante o proceso de consolidación de emprego de persoal laboral que o único que lle faltaba era a publicación das RPTs? NON.
• En xeral, vaise seguir para adiante con algún proceso? NON.
• Vamos tirar para adiante coas RPTs que xa están negociadas e so están pendentes de ir á Mesa Xeral? NON. (Somentes vai ir a de Educación).
• Vaise negociar o reparto do 10% pendente do Acordo Salarial do ano 2009? NON.
• Presentamos unha queixa por non convocar a mesa do acordo de Axentes Forestais, así como pola actitude da Consellaría de Medio Rural na mesa de seguimento do acordo de persoal de incendios. Van convocar a mesa do acordo? NON.

NON. Non se vai publicar nada mentres estea o goberno en funcións, confirmándose o afirmado na prensa segundo a cal o actual conselleiro da presidencia, Méndez Romeu, deu instruccións á Dirección Xeral da Función Pública de paralizar todos os nomeamentos de tribunais pendentes. Como podes comprobar o que nos queda mentres non veña o novo Goberno é case que irnos de vacacións, xa que a Administración está “pechada por reformas”.

Conseguiramos unha serie de cousas boas, destacando a magnífica promoción interna para funcionarios/as de corpos xerais que xa pasou por todos os trámites cando o goberno non estaba en funcións, so pendente da súa publicación no DOG, e agora pode ir ao lixo se o PP non quere tirar para adiante.

E o máis vergoñento é que a esto contribúen CCOO e CSIF que esixen que non se publique ningún tribunal, nin ningunha oferta de emprego, nin nada ate que chegue o novo goberno. Esquecen estes sindicatos que os acordos (e desacordos) foron tomados por un goberno “titular”, non en funcións, que nomear o tribunal dun proceso xa aprobado ou publicar unhas bases de oposición que pasaron todos os trámites antes das eleicións, son simples trámites que para nada van condicionar a acción política do goberno entrante. Se a cousa remata mal, teremos que darlles as grazas.

Para máis información: ourense@cigadmon.org – TELF: 988233850